Día 3 Erasmus+ Gafanha

Peche dunha experiencia Erasmus+: aprendizaxe, emocións e un “até ja”

E case sen darnos conta… chegamos ao final. Pero non a un final calquera, senón a deses que deixan bo sabor de boca, aprendizaxes reais e, sobre todo, ganas de repetir.

Un dos momentos máis interesantes deste último día foi a visita a unha sesión de RVCC con Carlos Ferreiro, nas instalacións dos bombeiros voluntarios. Alí puidemos ver en directo como se traballa o proxecto de vida co alumnado adulto de nivel B2. Máis alá dos contidos, o que realmente nos chamou a atención foi a implicación do alumnado, a maneira en que conectan a súa experiencia vital coa aprendizaxe.

Seguimos a xornada cunha visita á feira de emprego na Casa da Cultura de Ílhavo, un espazo cheo de movemento, oportunidades e moita interacción. Empresas públicas e privadas ofrecían información e posibilidades reais de inserción laboral, pero temos que dicilo: o stand do Centro Qualifica de Gafanha de Nazaré destacaba especialmente. Dinámico, atractivo e cunha oferta formativa que espertaba interese constante entre os asistentes. Un exemplo claro de como conectar formación e realidade laboral. Muito Giro!

Neste mesmo contexto tivemos tamén a oportunidade de coñecer á vicepresidenta da Cámara de Ílhavo, nun encontro que puxo en valor a importancia da colaboración institucional e o apoio aos proxectos educativos e de empregabilidade na rexión.

Despois tocou compartir mesa —porque tamén se aprende arredor dunha boa comida— coa maior parte do equipo do Qualifica. Entre risas, anécdotas e ese ambiente tan próximo que nos acompañou durante toda a semana, fomos consolidando algo máis que unha experiencia profesional. Foi, sen dúbida, un momento de equipa, de “partilha”.

Un paseo tranquilo por Ílhavo levounos despois ao Museo Marítimo, onde nos achegamos á tradición mariñeira da comarca e á importancia histórica do bacallau na súa economía. Cultura, identidade e historia que nos axudan a comprender mellor o contexto no que se desenvolve o seu proxecto educativo.

E como broche perfecto, a visita á Costa Nova: as súas casas de cores, case de postal, fotos aquí e alá… e, por suposto, unha parada obrigada para probar as famosas natas da cafetería Atlântida. Pequenos praceres que tamén forman parte da experiencia.

A xornada —e a mobilidade— rematou cun solpor na praia. Un deses momentos que non precisan moitas palabras. A despedida foi emotiva, sincera, con abrazos e cun “até ja” que soa máis a promesa que a despedida definitiva. Porque si, queda aberta unha porta: a de reencontrarnos en Ourense.

Antes de pechar esta experiencia, recibimos tamén un certificado que acredita a finalización da nosa mobilidade Erasmus+, un pequeno gran símbolo de todo o vivido, aprendido e compartido ao longo destes días.

Así, a EPAPU de Pereiro de Aguiar pecha a súa experiencia Erasmus+ dunha maneira excepcional. Cumpríronse os obxectivos, pero levamos moito máis: ideas, acción, novas perspectivas e a certeza de que a educación de persoas adultas segue avanzando grazas ao compromiso de equipos como o do Centro Qualifica de Gafanha de Nazaré e ao proxecto Erasmus+, o cal creou unha ponte sólida para a mellora do noso proxecto educativo.

Obrigado por todo, pola vosa acollida, polo voso traballo e por compartir tanto connosco. Porque, ao final, proxectos como Erasmus+ fan que a educación sexa máis aberta, máis integradora… e, sen dúbida, máis europea.

Até a próxima Gafanha!

Raúl e Mar

Día 2

Día 2 da nosa experiencia Erasmus+: 

Nesta segunda xornada da nosa aventura Erasmus+, o equipo da EPAPU do Pereiro de Aguiar continúa a súa estancia no centro Qualifica de Gafanha de Nazaré cunha nova inmersión de formativa.

Despois dunha primeira toma de contacto no día anterior, hoxe tocou ver de preto como traballan os docentes de educación de adultos no seu día a día. O currículo non é algo ríxido e inamovible, senón que se adapta ás necesidades reais do alumnado.

O máis chamativo foi a súa metodoloxía, baseada no desenvolvemento e validación de competencias a través do chamado “proxecto persoal de vida”. Si, así, tal cal soa: aprender con sentido, con obxectivos reais e conectando coa vida de cada persoa. 

Tivemos tamén a oportunidade de asistir a varias aulas e sesións de traballo con alumnado adulto, onde puidemos comprobar como o profesorado leva todo isto á práctica. Estratexias diversas, moita implicación… e bastante máis dinamismo do que un podería imaxinar antes de tomar o primeiro café da mañá.

Outro dos momentos estrela do día foi a “palestra”, unha actividade na que un exalumno comparte a súa experiencia co alumnado máis novo. Nesta ocasión, Roberto falounos da súa profesión como perruqueiro e do seu hobby como coleccionista de moedas. Un exemplo perfecto de que se pode cortar o pelo, coleccionar historia e, polo camiño, sacar o graduado escolar. Todo á vez. Case nada.

Por suposto, non todo foi “traballo duro” (que tamén). Houbo tempo para momentos máis relaxados, como unha comida institucional, unha pequena visita por zonas de interese local e, atención, unha merenda que xa quedará na nosa memoria (e probablemente tamén nas nosas básculas): leite creme, ovos moles e bolachas de nata. Digamos que a aprendizaxe foi… integral.

Cómpre destacar, unha vez máis, a calorosa acollida que estamos a recibir desde o primeiro momento. Non só nos fan sentir como na casa, senón que case nos fan dubidar de se queremos volver. Estanse a crear vínculos moi especiais entre o profesorado local e o noso equipo, algo que sen dúbida levaremos connosco.

E o mellor de todo: isto aínda non rematou. Queda unha xornada máis por diante, así que seguimos con ganas de aprender… e de ver que nos teñen preparado (e, sendo sinceros, tamén de descubrir que doce nos toca probar).

Continuará…

Primeiros pasos Erasmus+: aprendizaxe, acollida e motivación na educación de adultas (Gafanha de Nazaré)

A mobilidade Erasmus+ de tres profesores da EPAPU de Pereiro de Aguiar —Raúl, María e Mar— comezou da mellor maneira posible: cunha acollida calorosa, un ambiente de colaboración excepcional e unha xornada profundamente enriquecedora tanto a nivel profesional como persoal.

Dende a nosa chegada ao Centro Qualifica de Gafanha de Nazaré, sentímonos plenamente integrados grazas á proximidade e hospitalidade do equipo. Queremos destacar especialmente o acompañamento de Fátima, quen nos guiou ao longo de toda a xornada con gran dedicación e entusiasmo. A súa explicación detallada sobre a metodoloxía do centro permitiunos comprender non só o seu funcionamento, senón tamén a filosofía que sustenta o seu traballo: unha educación de persoas adultas centrada na persoa, flexible e orientada a resultados reais na vida laboral.

Durante o día, tivemos a oportunidade de coñecer de primeira man o proceso completo que segue o alumnado dende a súa chegada ao centro. Resultou especialmente interesante observar como as técnicas, Sara e Joana, realizan unha valoración inicial exhaustiva para identificar as necesidades, intereses e obxectivos de cada estudante. Este diagnóstico constitúe a base para deseñar, en colaboración co profesorado, un itinerario formativo adaptado que permita desenvolver as competencias necesarias para mellorar as súas oportunidades profesionais e a súa calidade de vida.

Esta experiencia enmárcase dentro dun período de job shadowing centrado na educación de persoas adultas, o que nos permitiu non só observar, senón tamén reflexionar sobre as nosas propias prácticas educativas. A forma na que o centro traballa a motivación do alumnado adulto —un aspecto clave neste ámbito— achegounos novas ideas e estratexias que sen dúbida enriquecerán o noso labor docente.

Ademais da aprendizaxe profesional, tamén tivemos a oportunidade de coñecer as instalacións do centro, que destacan pola súa calidade e adecuación ás necesidades formativas, creando un contorno moderno e acolledor para a aprendizaxe.

A xornada completouse cunha visita cultural ao Museo Vista Alegre de cerámica, unha experiencia igualmente enriquecedora que nos permitiu achegarnos a unha parte importante do patrimonio cultural da rexión. Este momento, ademais de ampliar os nosos coñecementos, contribuíu a fortalecer os lazos entre os participantes e a vivir a experiencia Erasmus+ dunha maneira máis completa.

Sen dúbida, este primeiro día marca un inicio prometedor para a nosa mobilidade. Novos coñecementos, inspiración, motivación nunha
acollida excepcional que superou todas as nosas expectativas.